Најмалку пет лица, меѓу кои и 13-годишно девојче, загинаа, а 32 се повредени во денешниот руски напад врз градот Суми во североисточна Украина, соопштија локалните власти.
Според информациите, руските сили употребиле три наведувани авионски бомби, кои погодиле цивилна инфраструктура. Две од бомбите паднале во прометен дел од градот, а едната експлодирала во близина на автобуска станица, каде што животот го загубило девојчето. Третата бомба погодила инфраструктурен објект.
Украинското обвинителство соопшти дека е отворена истрага за можно воено злосторство поради нападот врз цивилни цели.
Покрај девојчето, загинале уште тројца мажи, додека петтата жртва подоцна им подлегнала на повредите во болница.
Меѓу 32-та повредени има и три деца, а регионалниот гувернер Олег Хрихоров изјави дека петмина од повредените се во критична состојба.
Спасувачките екипи сè уште работат на терен, додека властите ја проценуваат материјалната штета. Оштетени се станбени згради, салон за автомобили, бензинска пумпа, ресторан и повеќе возила. Граѓаните се повикани да останат во засолништата поради опасност од нови напади.
Нападот врз Суми следува само неколку часа по масовниот ноќен руски воздушен напад врз Украина, во кој, според украинските воздухопловни сили, биле употребени шест балистички ракети, шест други проектили и 121 беспилотно летало.
Според украинските власти, во руските напади низ земјата во последните 24 часа загинале најмалку 10 лица, а најмалку 80 биле повредени.
Русија во последниот период сè почесто користи наведувани авионски бомби за напади врз градови во близина на линијата на фронтот, особено во Сумската, Харковската и Доњецката област.
