Русија соопшти дека ја одобрила првата mRNA антитуморска вакцина за лекување на меланом, наменета за возрасни пациенти со неоперабилен или метастатски карцином на кожата.
Како што објави Националниот медицински истражувачки центар за радиологија, вакцината е развиена во соработка со Националниот истражувачки центар за епидемиологија и микробиологија „Гамалеја“, а ќе се применува во комбинација со инхибитори на имунолошките контролни точки (ICI). Кај одредени пациенти ќе може да се користи и како дополнителна терапија по хируршко отстранување на метастазите.
Терапијата се базира на индивидуалниот генетски профил на туморот на секој пациент. На тој начин, имунолошкиот систем се „обучува“ да ги препознава и уништува клетките на туморот, при што се намалува оштетувањето на здравото ткиво.
Според информациите објавени од рускиот центар, вакцината е наменета за пациенти кај кои меланомот се вратил по претходен третман, за новодијагностицирани пациенти со меланом во стадиум IIB–IV кај кои е планирана операција, како и за лица со далечни метастази, но без метастази во мозокот, кои претходно не примиле медикаментозен антитуморски третман.
Руските власти наведуваат дека ова е прво одобрение за ваков тип mRNA антитуморска вакцина, која би можела да отвори нови можности во персонализираното лекување на пациентите со меланом.
