Русија ја суспендираше пловидбата во Азовското Море откако украински дронови во изминатите неколку дена извршија серија напади врз десетици пловила на овој стратешки поморски коридор.
Командантот на украинските сили за беспилотни летала, Роберт Бровди, соопшти дека во текот на ноќта биле погодени десет танкери, четири траекти и голема рафинерија за нафта во рускиот град Сизрањ. Според него, биле изведени и напади врз трафостаници на окупираниот Крим.
Жителите на Сизрањ пријавиле силни експлозии и голем пожар во рафинеријата, додека руските власти потврдија дека се запалил еден танкер при влез во каналот што ги поврзува Азовското и Црното Море. Локални руски канали објавија и за две големи излевања на нафта во близина на брегот кај Таганрог.
Азовското Море е од клучно значење за Русија, бидејќи преку него се транспортираат нафта, жито и други стоки кон светските пазари. Москва веќе ја запре и пловидбата низ каналот Дон–Азов, со што дополнително е ограничен поморскиот сообраќај во регионот.
Украинските власти наведуваат дека нападите се дел од поширока стратегија за нарушување на руската воена логистика, снабдувањето со гориво и транспортните правци кон окупираниот Крим.
Во меѓувреме, продолжуваат и руските напади врз Украина. Во текот на ноќта, најмалку три лица загинаа во Дњепропетровската област, а едно лице го загуби животот во напад со дрон врз Херсон.
