Русија предупреди дека секое распоредување на мултинационални воени сили во Украина по евентуален мировен договор ќе го смета за закана и легитимна воена цел.
Портпаролката на руското Министерство за надворешни работи, Марија Захарова, изјави дека Москва не прифаќа распоредување на воени контингенти од таканаречената „коалиција на подготвените“.
„Тоа би значело странска интервенција и дополнителна ескалација на заканите по безбедноста на Русија. Таквите единици ќе ги сметаме за легитимни воени цели“, изјави Захарова.
Изјавата следува откако западните сојузници на Украина на состанок во Париз ја потврдија намерата да формираат мултинационални сили што би биле распоредени по завршувањето на воените дејствија, со цел да помогнат во гарантирањето на безбедноста на Украина и обновата на нејзините вооружени сили.
„Коалицијата на подготвените“, предводена од Франција и Велика Британија, ја сочинуваат 35 држави, а во наредните месеци се планирани и заеднички воени вежби за демонстрација на нивната подготвеност. Во воената парада во Париз по повод националниот празник на Франција учествуваа и украински војници заедно со припадници на земјите од коалицијата.
