Руска студија носи надеж: Ново соединение успешно против рак на дојка

Научници од Јужноуралскиот државен универзитет, во соработка со меѓународен истражувачки тим, развиле и тестирале нови соединенија на платина кои покажале ветувачки резултати во лекувањето на рак на дојка.

— реклама —

Според авторите на истражувањето, синтетизираните соединенија покажале висока ефикасност и помала токсичност во споредба со постоечките комерцијални терапии. Истражувачите наведуваат дека новите соединенија би можеле да бидат основа за развој на побезбедни и поефикасни лекови.

„За првпат добивме соединенија кои не само што го сузбиваат растот на туморот туку и го штитат организмот од токсичните ефекти“, изјавила научничката Алена Зикова.

— реклама —

Во центарот на истражувањето било соединението AV1 – јонски комплекс на платина(IV). Тестирањата на клеточни култури од рак на дојка покажале дека AV1 го инхибира растот на малигните клетки двојно поефикасно од широко користен комерцијален лек.

— реклама —

Научниците истакнуваат дека, за разлика од класичната хемотерапија базирана на платина, која често предизвикува сериозни несакани ефекти, новото соединение останува стабилно во крвотокот и се активира директно во клетките на ракот.

Во тестирањата на стаорци со рак на дојка, AV1 покажал силен антиоксидативен и антиинфламаторен ефект, го намалил ширењето на туморот и метастазите, а не биле забележани оштетувања на црниот дроб, бубрезите или срцето.

Во истражувањето учествувале и научници од Институтот „Руѓер Бошковиќ“, како и универзитети од Индија и Саудиска Арабија.