Рускиот економист Андреј Клепач, кој до неодамна беше главен економист во руската државна развојна банка ВЕБ, предупредил дека земјата се движи кон сериозна економска и социјална криза. Според неговата анализа, комбинацијата од војната, високите каматни стапки и растечката зависност од Кина би можела да доведе до стагнација на руската економија.
Клепач уште во мај, на собир на водечки економисти и научници во Москва, оценил дека со актуелната макроекономска политика Русија би можела да се соочи со „социјална криза“, предупредувајќи дека економијата може да запре, а тоа да предизвика незадоволство кај населението.
Особено непријатен за Кремљ е делот од неговата анализа во кој се наведува дека Русија во одредени области технолошки и економски заостанува дури и зад Украина.
Според „Њузвик“, анализата на Клепач била позната во руските структури со месеци пред нејзините детали да станат јавни. Тој продолжил нормално да ја извршува функцијата, но откако извештајот бил објавен во руските медиуми, бил сменет од позицијата.
Списанието оценува дека неговата смена отвора прашање дали за Кремљ поголем проблем претставува самата неповолна економска проценка или фактот што таа станала достапна за јавноста.
