Руски научници развиле нов препарат кој, според нивните тврдења, може значително да ги намали несаканите ефекти од радиотерапијата кај пациентите што се лекуваат од рак.
Ова го соопшти главниот руски онколог и директор на Националниот медицински истражувачки центар за радиологија при руското Министерство за здравство, академик Андреј Каприн.
Според него, препаратот е наменет за заштита на организмот од штетното дејство на јонизирачкото зрачење, со цел, покрај уништувањето на туморот, да се зачуваат и здравите ткива за време на радиотерапијата.
Каприн посочи дека ваквите радиопротективни средства би можеле да имаат примена и во заштитата од зрачење при технолошки несреќи и други вонредни ситуации.
Тој нагласи дека препаратот во моментов се наоѓа во фаза на стручна експертиза и дека е прерано да се зборува за негова поширока примена во клиничката практика. Сепак, досегашните резултати, според него, даваат основа за внимателен оптимизам во понатамошниот развој на оваа технологија.
