Запрашана каде завршила торбата со милионот земен од Орце Камчев, обвинителката Вилма Русковска која го води случајот „Рекет“ во емисијата „Што не е јасно“ го запраша новинарот „Вас ве интересира за торбата или парите“, на што тој одговори „Парите“. Почна со анализа на трошоците, зборуваше за најдени фискални сметки, но и за автомобили купени од Јовановски.
„148 илјади евра потрошени во продавници во Италија со мајка му. За тоа најдовме фискални сметки. Телевизија е скапа играчка. Јас знам дека тоа чини од 60 до 80 илјади евра месечно. Поготово, знаете кој калибар на новинари... Па сигурно, тие не седеле во таа телевизија зошто многу го сакаат и почитуваат Бојан Јовановски. Потоа еден џип, втор џип, трет џип. Добро, на лизинг ама и тој треба да се плаќа“, рече Русковска.
Запрашана дали ќе ја напушти функцијата прв човек на Обвинителството за организиран криминал и корупција и ќе биде адвокат, Русковска рече: „Не, не е точно. Но, доколку позицијата ја напушти Љубомир Јовески ја напуштам и јас“.
