Компромис меѓу политичките партии за да се овозможи двотретинско мнозинство треба да има, но не по секоја цена, смета Заев.
„Јас се надевам дека никој не го прави ова за да го забошоти и да го заштити криминалот. Тоа нема да го дозволиме – компромис треба, но да не ги поминеме црвените линиии. СЈО мора да има иднина, предметите на СЈО, истрагите и предистрагите мораат да имаат иднина. Иднината треба да ја одлучи правосудниот систем, обвинителите и судиите, а не ние политичарите, “, изјави Зоран Заев – претседател на Влада.
Откако вчера министерката за правда Рената Дескоска рече дека постои можност за продолжување на постапките на СЈО преку измени во друг закон кој се носи со просто мнозинство, пратениците од опозицијата го окарактеризираа како невладеење на правото. Денес лидерот на ВМРО ДПМНЕ Христијан Мицкоски обвини за пресметка со политичките опоненти.
Дваесетина амандмани ќе поднесе ВМРО-ДПМНЕ на предлог-законот за обвинителство, кој денеска е на дневен ред во собраниската Комисија за европски прашања. Од опозициската партија велат дека не им е целта да го блокираат законот со стотина амандмани, а и не сакаат да ѝ дадат повод на власта да прифати процентуално голем број, но не и суштински важните, па затоа ќе се сконцентрираат на клучните забелешки.
Предметите што досега ги покрена СЈО се во еден од нив. ВМРО-ДПМНЕ бара сите тие што беа покренати да бидат префрлени во новоформираното Обвинителство за гонење организиран криминал и висока корупција, а освен тоа, новиот шеф да може да отвори истрагата и по допрен глас, да обезбедува докази и да ја води процедурата во случаи што досега не беа отворени. Втората крупна разлика во поимањето на законот за обвинителство меѓу власта и опозицијата се статусот на останатите обвинители во СЈО, со исклучок на притворената Катица Јанева, чиј мандат и онака ќе завршеше на 15 септември. ВМРО-ДПМНЕ бара тие да се вратат во матичните обвинителства од каде што дојдоа во СЈО, а потоа да конкурираат за место во новоформираното обвинителство.