Планираната аукција на повеќе од 100 предмети извадени од олупината на потонатиот „Титаник“ се соочува со противење од американската влада, покажуваат новообјавените судски документи.
Компанијата RMS Titanic Inc., која има ексклузивни права за истражување и вадење предмети од потонатиот брод, планира за првпат да продаде дел од својата колекција. Меѓу предметите што би можеле да се најдат на аукција се бронзена фигура на ангел, ѓердан со златни грутки и приврзок во форма на срце.
Компанијата, исто така, планира и меѓународна изложба во четири градови, но локациите засега не се соопштени.
На продажбата се спротивстави Националната управа за океани и атмосфера (NOAA), која ги застапува интересите на САД во заштитата на локацијата на олупината во северниот дел на Атлантскиот Океан.
Од агенцијата сметаат дека аукцијата би ги прекршила претходните судски договори, според кои предметите треба да се чуваат како единствена колекција и да бидат достапни за јавноста преку музејски поставки.
Во судскиот поднесок американската влада наведува дека компанијата не побарала одобрение од судот за продажбата и тврди дека не е ограничена во можноста да ги продава артефактите.
Од 1987 година, за време на бројни експедиции, од олупината на „Титаник“ се извадени илјадници предмети, вклучително и делови од самиот брод. Досега компанијата главно ги финансирала своите активности преку изложби, додека претходните обиди за продажба на предмети наидувале на отпор од судовите, организациите за заштита на културното наследство и семејствата на жртвите.
Интересот на колекционерите за предметите поврзани со RMS Titanic останува голем. Минатата година, златниот џебен часовник што му припаѓал на Исидор Штраус беше продаден за повеќе од два милиони долари, додека виолината за која се верува дека свирела за време на потонувањето на бродот во 2013 година достигна цена од 1,45 милиони долари.
„Титаник“ потона на 15 април 1912 година по судир со санта мраз за време на своето прво патување од Саутемптон кон Њујорк, при што загинаа повеќе од 1.500 луѓе.
