Сашо Донев повторно е избран за претседател на Општинскиот комитет на ВМРО-ДПМНЕ во Охрид, откако уште еднаш ја доби довербата од членовите и партиските органи.
Во обраќањето до сопартијците, пријателите и сограѓаните, Донев изрази благодарност за поддршката, оценувајќи дека добиената доверба претставува признание за досегашната работа, но и дополнителен поттик за идните предизвици.
„Со огромна чест и задоволство ве информирам дека уште еднаш ми е укажана довербата да го предводам Општинскиот комитет на ВМРО-ДПМНЕ Охрид. Упатувам огромна благодарност до членовите и до органите на партијата за поддршката. Оваа доверба не е само признание за досегашното, туку и силен мотив за сè она што доаѓа“, порача Донев.
Тој истакна дека заедно со членовите на комитетот покажале дека Охрид има капацитет, знаење и енергија за големи промени и успеси, нагласувајќи дека претстои уште многу работа.
„Како тим, со сите вас, докажавме дека Охрид има капацитет, знаење и срце за големи промени и уште поголеми победи. Но, тука не застануваме. Нè чека уште многу работа, уште многу заеднички успеси и уште посилно темпо“, истакна тој.
Донев порача дека вратите на Општинскиот комитет остануваат отворени за сите кои сакаат да придонесат со идеи и ангажман за развојот на Охрид.
„Продолжуваме уште посилно! За Охрид! За Македонија!“, порача Донев.
