Портпаролот на ВМРО-ДПМНЕ, Валентин Манасиевски, денеска на прес-конференцијата обвини дека СДСМ и Левица со десетици илјади амандмани го блокираат Изборниот законик, иако, како што рече, претходно со месеци учествувале во неговото усогласување.
Според Манасиевски, Изборниот законик бил усогласен со забелешките на ОБСЕ и ОДИХР, а амандманите што ги поднеле СДСМ и Левица, според него, не се суштински, туку имаат цел да ја попречат реализацијата на Реформската агенда и исполнувањето на обврските поврзани со Планот за раст.
Тој изјави дека ВМРО-ДПМНЕ предложило да се прифатат амандмани што се однесуваат на начинот на заокружување на гласачкото ливче и постапката за поднесување приговори, а останатите, како што ги нарече, „демагошки амандмани“ да бидат повлечени за законот да биде донесен со политички консензус.
Манасиевски нагласи дека единствената „црвена линија“ за ВМРО-ДПМНЕ останува можноста македонската дијаспора да гласа по електронски пат на следните претседателски избори.
Воедно, тој оцени дека СДСМ и Левица се обидуваат да создадат алиби за, како што рече, изборниот пораз што ги очекува на следните избори.
