На денешната прес-конференција, портпаролот на ВМРО-ДПМНЕ, Валентин Манасиевски, ја повика СДСМ, Левица и ДУИ најнапред да усогласат заеднички став околу измените на Изборниот законик, по што, како што велат од партијата, се подготвени да разговараат за нивните предлози, доколку биде прифатен моделот за електронско или поштенско гласање на дијаспората.
Манасиевски оцени дека опозициските партии испраќаат спротивставени пораки во јавноста и немаат единствен пристап кон изборните реформи.
„СДСМ, Левица и ДУИ прво нека се договорат меѓу себе што сакаат од Изборниот законик, а ВМРО-ДПМНЕ ќе прифати сè што ќе побараат, само дијаспората да гласа по електронски пат или по пошта“, изјави Манасиевски.
Тој додаде дека, според партијата, опозицијата треба да усогласи ставови за прашања како што се една изборна единица, моделот на финансирање, изборните приговори и начинот на гласање на иселениците.
Од ВМРО-ДПМНЕ велат дека се подготвени за разговори за сите прашања што се однесуваат на унапредување на политичкиот систем, реформите и европската интеграција на државата.
Според Манасиевски, Изборниот законик не треба да биде предмет на дневнополитички пресметки и порача дека партијата е подготвена веднаш да започне разговори доколку опозициските партии постигнат заеднички став.
