ВМРО-ДПМНЕ преку соопштение упати обвинување до СДС за состојбите во Гостивар, тврдејќи дека партијата не може да ја избегне политичката одговорност бидејќи, како што наведуваат, заедно со Лимани учествува во локалната власт.
Од владејачката партија велат дека СДС веќе еден месец се обидува да ја префрли одговорноста, наместо да се соочи со сопствената улога во функционирањето на Општина Гостивар.
„Заедно со Лимани ја делат локалната власт во Гостивар, а со тоа ја делат и одговорноста за состојбите во општината“, наведуваат од ВМРО-ДПМНЕ.
Од партијата додаваат дека наместо политички обвинувања, СДС треба да побара одговорност од своите партнери во локалната власт и да ја признае сопствената политичка одговорност.
Во соопштението се посочува и дека Владата предводена од ВМРО-ДПМНЕ, според нив, веднаш презела мерки по проблемот со водоснабдувањето во Гостивар. На граѓаните им било обезбедено бесплатно снабдување со вода, додека надлежните институции постапиле за надминување на проблемот и заштита на населението.
Од ВМРО-ДПМНЕ велат дека институциите постапиле, случајот се истражува, а водата повторно е безбедна за пиење.
„Граѓаните заслужуваат институции кои решаваат проблеми, а не политички игри и префрлање одговорност“, се наведува во соопштението.
Од партијата додаваат дека ќе продолжат да дејствуваат во насока на решавање на проблемите на граѓаните, додека од СДС бараат да се соочи со, како што велат, фактот дека како дел од локалната власт во Гостивар ја дели одговорноста за состојбите во општината, вклучително и за проблемот со водата.
