„СДС резултатите од анализите нека ги побара од својот градоначалник, ЈП Комуналец е надлежен за објавување на испитувањата“, вели ВМРО-ДПМНЕ

ВМРО-ДПМНЕ преку соопштение реагира на денешните обвинувања од СДСМ за необјавените анализи на водата во Гостивар, посочувајќи дека за испитувањата и нивното објавување е надлежно ЈП „Комуналец“ Гостивар, со кое раководи локалната власт.

Од партијата велат дека СДСМ треба да ги побара резултатите од својот градоначалник Валбон Лимани, кого го посочуваат како надлежен за работата на јавното претпријатие.

— реклама —

„Секоја анализа, секое испитување и негово објавување е директна надлежност на ЈП Комуналец Гостивар. Така да по ова прашање, нека се обратат до Валбон Лимани и нека му кажат да ги објави резултатите“, стои во реакцијата.

ВМРО-ДПМНЕ наведува дека градоначалникот на општината е надлежен за поставување и разрешување на директорот на ЈП „Комуналец“, а дистрибуцијата на водата до домовите, исто така, е во надлежност на јавното претпријатие.

— реклама —

Од партијата тврдат дека пропустите во работата на локалните институции довеле до кризата со водоснабдувањето, посочувајќи дека директорката на претпријатието е приведена.

Во реакцијата се наведува и дека поради, како што оценуваат, неспособноста на локалната власт и институциите во Гостивар, Владата предводена од ВМРО-ДПМНЕ морала да интервенира.

„За рекорден временски период, да се исчисти водата, да се пушти првенствено водата за техничка употреба, а потоа и за пиење. Во меѓувреме, секојдневно Гостиварчани добиваа флаширана вода за пиење. Од другата страна пак, СДС донираше 0 шишиња вода за граѓаните“, се наведува во соопштението.

— реклама —

Од ВМРО-ДПМНЕ сметаат дека кризата со водоснабдувањето по еден месец е надмината, но бараат одговорност од сите што евентуално придонеле за настанатата состојба.

„Одговорноста треба да се преземе од страна на обвинителството и да се казнат сите оние кои имаат и најмала индиректна одговорност во случајот“, порачаа од партијата.

— реклама —

Во реакцијата ВМРО-ДПМНЕ упатува критики и кон поранешните министри за здравство од редовите на СДСМ, вклучително и кон Венко Филипче. Од партијата тврдат дека до Министерството за здравство во периодот на претходната власт стигнале повеќе од 400 испитувања за загадена вода, но дека, како што наведуваат, не било реагирано ниту на едно.

„Да резимираме, СДС и Филипче се најмалку компетентни да говорат. Со години не реагирале, а денес само обвинуваат. Лицемерието на СДС и Филипче граѓаните го препознаваат“, се вели во реакцијата на ВМРО-ДПМНЕ.