СДСМ: Ако Стојаноски сака договор до 15 јули, нека прифати контролирано гласање

СДСМ ја обвини ВМРО-ДПМНЕ дека намерно го одолговлекува постигнувањето договор за измените на Изборниот законик со цел, како што наведуваат, да создаде алиби за застојот на реформите поврзани со европската интеграција на државата.

— реклама —

Од партијата реагираат на повикот на пратеникот Бојан Стојаноски до 15 јули да биде постигнат договор за Изборниот законик, оценувајќи дека владејачката партија нема вистинска намера да постигне консензус.

— реклама —

Според СДСМ, проблемот е во тоа што ВМРО-ДПМНЕ не прифаќа механизми за контрола на гласањето на дијаспората, што, според нив, го блокира делот од Реформската агенда кој се однесува на изборното законодавство.

— реклама —

Од СДСМ велат дека дијаспората треба да го задржи правото на глас, но гласањето мора да биде контролирано и проверливо за да се спречат можни изборни злоупотреби.

Партијата додава дека нема да поддржи решенија кои, според нив, би овозможиле изборни манипулации, ниту ќе дозволи реформите да бидат ставени во втор план поради партиски интереси. Од СДСМ порачуваат дека, доколку ВМРО-ДПМНЕ навистина сака договор, треба да прифати контролирано гласање на дијаспората.