„СДСМ бара минимална плата од 600 евра – законот го поднесуваме повторно во Собранието“, вели Филипче

СДСМ повторно ќе поднесе во Собранието предлог-закон со кој бара минималната плата да се зголеми на 600 евра, најави лидерот на партијата Венко Филипче на денешната прес-конференција.

Филипче рече дека предлогот ќе биде поднесен на почетокот на септември, по продолжувањето на работата на Собранието, оценувајќи дека актуелното ниво на минималната плата не е доволно за покривање на основните животни трошоци.

— реклама —

„Граѓаните не можат да се прелажат. Бројките кои што премиерот ги кажува, очигледно од светот во кој што само тој и неговата мала група на луѓе околу него живеат, граѓаните не ги чувствуваат. Тие ги гледаат празните паричници и празните фрижидери“, рече Филипче.

— реклама —

Според него, доколку економските показатели се толку позитивни како што тврди Владата, тогаш зголемувањето на минималната плата на 600 евра треба да биде една од првите мерки.

„Не 26.000 денари како што е сега, туку толку колку што им е потребно на луѓето да ги закрпат основните потреби, основните трошоци, посебно кога почнува школската година и кога трошоците за живот, за функционирање многу растат“, рече претседателот на СДСМ.

— реклама —

Филипче најави и барање за зголемување на платите во повеќе сектори, особено во здравството и образованието. Тој се повика на мерки што, како што рече, биле реализирани за време на претходната влада предводена од СДСМ, при што основните плати на специјалистите и лекарите биле зголемени за 40 отсто, како и платите на вработените во образованието.

— реклама —

Лидерот на СДСМ оцени дека зголемувањето на платите е потребно поради растот на трошоците за живот и додаде дека со тоа партијата го дава својот одговор на економските политики на актуелната Влада.

„Владата предводена од Христијан Мицкоски веќе ја започна третата година од својата работа и на ниту едно поле ние не гледаме никакви резултати. Не гледаме резултати на полето на економијата, во здравството, во образованието, во земјоделството“, рече Филипче.