СДСМ до ВМРО-ДПМНЕ: Велите да пријавиме? Пријавуваме со месеци, вие сте на власт

СДСМ повторно упати серија обвинувања кон премиерот Христијан Мицкоски и ВМРО-ДПМНЕ, тврдејќи дека претседателот на партијата Венко Филипче во изминатиот период обелоденил повеќе случаи за кои опозицијата бара постапување од надлежните институции.

„Филипче го откри криминалот на Мицкоски, на ВМРО-ОКГ и на вашиот анти-НАТО и анти-ЕУ Спутник“, се наведува во соопштението на СДСМ.

Од партијата реагираат и на повиците од ВМРО-ДПМНЕ сомнежите за незаконитости да бидат пријавени во институциите, тврдејќи дека тоа веќе го прават.

— реклама —

„Пријавуваме. Постојано. Со месеци. До ДКСК. До Обвинителството. Го пријавивме и Мицкоски – обвинителот ја отфрли пријавата“, велат од СДСМ.

Опозицијата повторно ги отвора случаите за кои зборуваше во изминатите недели, меѓу кои тендерот за железницата од 1,6 милиони евра што го поврзува со Ќуркчиев, финансирањето на настапот на Дејвид Гета, проектите за дата-центри, антимонот и лобирањето на Владата во САД.

Во однос на настапот на Гета, СДСМ останува на тврдењето дека, и покрај претходните изјави дека настанот нема да ги чини граѓаните, биле издвоени 5,53 милиони евра од Државната лотарија.

— реклама —

Партијата повторно го споменува и договорот за лобирање во САД во вредност од 1,56 милиони долари, кој го поврзува со бизнисмен од оружената индустрија, како и најавите за инвестиции во дата-центри и користење вода од Вардар.

СДСМ бара да се проверат и наводите поврзани со „Платформа 2.0“, тендерите кои претходно ги отвораше во јавноста и најавената набавка на автобуси, која партијата ја поврзува со унгарскиот премиер Виктор Орбан.

— реклама —

Во соопштението повторно се отвора и прашањето за набавката на хеликоптери за Армијата. СДСМ наведува дека документацијата за цената и договорот се наоѓа во Министерството за одбрана и бара институциите да ја проверат.

Партијата упатува и обвинувања дека обвинителството и полицијата не постапуваат независно во случаите што ги отвора опозицијата. Како еден од примерите го наведува и случајот со пет тони дрога за кој претходно побара одговори од институциите. СДСМ за овие тврдења не приложува нови докази во денешното соопштение.

Во политичкиот дел од реакцијата, СДСМ повторно ја поврзува групата поранешни партиски функционери зад „Платформата“ со Мицкоски, нарекувајќи ја „Платформа 2.0“ и тврдејќи дека станува збор за проект за слабеење на опозицијата. Ова е став на СДСМ што претставниците на платформата претходно го отфрлија.

Од партијата се повикуваат и на пораките на претседателката на Европската комисија Урсула фон дер Лајен за македонскиот јазик и идентитет, тврдејќи дека претходната влада ги заштитила националните позиции во евроинтегративниот процес.

„СДСМ ги именува и своите. Законот мора да важи за сите. Вие ги штитите“, порачуваат од партијата, обвинувајќи дека институциите се селективни во постапувањето.

„Кога ќе се анализираат без телефонски повик, прво ќе стигнете до криминалот и корупцијата. Потоа до Спутникот. А на крајот и до арамијата. Го чекаме вашиот одговор. Вие сте на власт“, се наведува во соопштението на СДСМ.