СДСМ: Економската реалност е поинаква од ветувањата на Мицкоски

СДСМ обвинува дека Македонија останува меѓу последните европски економии според БДП по жител, повикувајќи се на проекциите на Меѓународниот монетарен фонд за 2026 година.

— реклама —

Во соопштението од партијата се наведува дека Македонија е на 41. место меѓу 48 европски економии, со проектиран БДП по жител од 11.762 долари. Од земјите во регионот, пред Македонија се Србија со 17.126 долари, Црна Гора со 16.211 долари и Албанија со 13.968 долари, додека Босна и Херцеговина е на 43. место. На врвот на листата се Лихтенштајн, Луксембург и Ирска.

Од СДСМ оценуваат дека разликата со најбогатите европски економии е огромна и посочуваат дека Германија има повеќе од петпати повисок БДП по жител од Македонија.

— реклама —

„Ова е реалната состојба на економијата. Не бајките на Мицкоски за трета економија во Европа. Не лагите за најбрз раст на платите и пензиите“, наведуваат од партијата.

— реклама —

Во соопштението СДСМ ги критикува економските политики на Владата, посочувајќи на ново задолжување од четири милијарди евра за две години, најавено поскапување на парното и електричната енергија и отсуство на зголемување на минималната плата.

Од партијата се повикуваат и на изјава на премиерот Христијан Мицкоски дека во буџетот нема доволно средства за избори, оценувајќи дека тоа ја покажува состојбата со јавните финансии.

— реклама —

СДСМ упатува и обвинувања за наводни корупциски тендери и врски со „Алта банка“, при што бара одговори за податоците поврзани со банката. Во соопштението партијата изнесува остри критики кон премиерот и најавува дека, како што наведува, одговорните ќе понесат одговорност.