СДСМ ја претстави дигиталната платформа „МИЦКО“ за пријавување случаи на корупција

На прес-конференција денеска, генералниот секретар на СДСМ, Александар Саша Димитријевиќ, го промовираше новиот дигитален проект на партискиот Антикорупциски тим – платформата „Македонски истражувачки центар за корупција и организиран криминал“ (МИЦКО), достапна на https://micko.mk/.

— реклама —

Како што беше објаснето, платформата е наменета за истражување, систематизација и архивирање на јавно достапни податоци и материјали поврзани со наводни случаи на корупција во земјата. Според СДСМ, целта е граѓаните, новинарите и експертската јавност да добијат полесен пристап до собрани информации од повеќе извори.

Од партијата наведоа дека тимот врши анализа на тендери, медиумски објави и случаи што се однесуваат на можни судири на интереси, како и други сомнителни активности во институциите на локално и централно ниво. Материјалите се архивираат во дигитален регистар со наведени извори, датуми и детални податоци.

— реклама —

На платформата се објавени и дел од досегашните случаи што АКТ ги претставуваше во јавноста, меѓу кои и примерот со фирма со двајца вработени што добила тендери во вредност од 9 милиони евра, потоа компанија со 161 добиен тендер во вкупен износ од 5,3 милиони евра, како и наводите поврзани со преземањето на „Алта банка“.

— реклама —

Платформата, како што беше истакнато, содржи и можност граѓаните директно да пријават сомнежи за корупција или злоупотреби, со опција да приложат документација и да го сторат тоа анонимно.

„Ги повикуваме граѓаните, медиумите и организациите да се вклучат и да придонесат со пријавување“, рече Димитријевиќ, нагласувајќи дека платформата од денес е целосно оперативна.

СДСМ оцени дека борбата против корупцијата е „заеднички интерес“ и најави дека сите преземени постапки ќе бидат јавно достапни преку платформата.