СДСМ остро реагираше на денешната прес-конференција на пратеникот на ВМРО-ДПМНЕ, Антонио Милошоски, обвинувајќи ја владејачката партија дека се обидува да создаде алиби за, како што велат, сопственото неисполнување на обврските од Реформската агенда кон Европската Унија.
Од опозициската партија оценуваат дека обвинувањата упатени кон претседателот на СДСМ, Венко Филипче, се резултат на, како што наведуваат, паника во редовите на ВМРО-ДПМНЕ.
„Сега, за неисполнувањето на обврските кон ЕУ, повторно бараат алиби кај опозицијата, поточно кај СДСМ, како единствена вистинска опозиција“, соопштија од партијата.
Во реакцијата, СДСМ тврди дека власта не ги реализирала најавените реформи и посочува дека дел од законските решенија, меѓу кои и законот за Судскиот совет, биле вратени на доработка.
Партијата најави дека уште денеска ќе поднесе амандмани на предложениот Изборен законик, со цел, како што велат, граѓаните да бидат запознаени со содржината на предложените измени.
Од СДСМ, исто така, обвинуваат дека ВМРО-ДПМНЕ се обидува да ги забрза предвремените избори, оценувајќи дека владините политики не ги дале очекуваните резултати.
„Наместо да ги решаваат најважните точки од Реформската агенда, повторно прават претстава“, наведуваат од СДСМ во реакцијата на изјавите на Милошоски.
