Лидерот на СДСМ, Венко Филипче, изјави дека неговата партија нема да биде алиби за одржување предвремени парламентарни избори и оцени дека тие ќе се случат само кога власта ќе се соочи со финансиски проблеми.
„Нема да дадеме алиби за избори, предвремени. Избори ќе има кога ќе снема пари. Тоа е концептот на нивното владеење. Кога ќе ги дотрошат сите пари за партиски тендери. Гледате и контрадикторни изјави, сакаме предвремени, па ќе има редовни, спремни сме... Избори ќе има кога ќе снема пари“, рече Филипче.
Тој се осврна и на најавената реконструкција на Владата, оценувајќи дека граѓаните не треба да очекуваат суштински промени.
„Што може да очекуваат граѓаните од реконструкцијата? Ништо. Сѐ ќе биде исто, нема напредок, нема да се почувствува. Некои козметички промени ќе бидат. Ќе има промена на имиња“, изјави лидерот на СДСМ.
Премиерот Христијан Мицкоски претходно најави дека разговорите со владините коалициски партнери за реконструкција на Владата ќе започнат по одбележувањето на роденденот на ВМРО-ДПМНЕ на 17 јуни во Струмица. Според него, ставот на владејачкото мнозинство останува дека нема потреба од предвремени избори и дека државата треба да оди на редовни парламентарни избори.
