СДСМ обвини дека ВМРО-ДПМНЕ изнесува невистини во врска со измените на Изборниот законик и оцени дека со своите постапки намерно ги блокира реформите и европската интеграција на државата.
Од партијата велат дека тврдењата за таканаречениот „празен лист“ не се точни, бидејќи, според нив, документот веќе содржел заокружени броеви и имиња и претставувал обид да се наметне модел што ќе овозможи контрола врз гласањето на дијаспората.
СДСМ наведува дека ги прифаќа препораките на ОБСЕ и ОДИХР, но не и, како што тврдат, предлозите на ВМРО-ДПМНЕ, за кои оценуваат дека не се во насока на обезбедување фер и демократски изборен процес.
Во партиското соопштение се тврди и дека ВМРО-ДПМНЕ нема вистинска намера да ги спроведе реформите и дека намерно создава пречки за да го оправда доцнењето со исполнувањето на европската агенда.
„Жртва не е опозицијата. Жртва е Македонија и нејзината европска иднина“, наведуваат од СДСМ.
Од партијата исто така обвинуваат дека во Европската Унија нема простор за, како што велат, неказнивост и враќање имот стекнат со криминал, оценувајќи дека токму затоа ВМРО-ДПМНЕ не е заинтересирана за напредокот на земјата кон членство во ЕУ.
