СДСМ обвини дека власта преку усвоената Резолуција има намера да воведе цензура и да ја ограничи слободата на медиумите, додека ВМРО-ДПМНЕ возврати со остра реакција, оценувајќи ги обвинувањата како неосновани и политички мотивирани.
Членот на Извршниот одбор на СДСМ, Петар Огњеновиќ, изјави дека најнов доказ за, како што рече, „обид за замолчување на јавноста“, е изјавата на пратеникот од ВМРО-ДПМНЕ Бојан Стојановски, дадена во интервју на Сител телевизија.
Според Огњеновиќ, Стојановски, фалејќи ја Резолуцијата, изјавил дека таа е „добра за медиумите“ затоа што ќе се санкционирало ширењето невистини, што, според СДСМ, значи дека власта си зема право да одлучува што е вистина, а што не.
„Ова е потврда дека Резолуцијата не е насочена само кон опозицијата, туку и кон медиумите. Секој што ќе ја критикува власта ќе биде етикетиран како дезинформатор“, изјави Огњеновиќ, додавајќи дека ваквиот пристап претставува опасен преседан за демократското општество.
Од СДСМ оценуваат дека станува збор за обид за воведување режимска матрица во која секоја критика се толкува како закана за државата, и најавуваат дека нема да дозволат, како што велат, „гушење на слободата на говор“.
На обвинувањата реагираше ВМРО-ДПМНЕ со соопштение и видео-материјал, во кое партијата остро ги критикува ставовите на СДСМ, обвинувајќи ги за неконзистентност и политичка конфузија.
Од ВМРО-ДПМНЕ ги повикаа СДСМ и лидерот Венко Филипче да организираат протести против, како што наведуваат, „про-српските ставови на поранешниот лидер Зоран Заев“, посочувајќи дека токму Заев во минатото јавно изразувал позитивни оценки за српскиот претседател Александар Вучиќ.
„Колку и анкети да прават, епилогот за СДСМ е ист. Партијата нема јасна политика, ги менува ставовите и реагира само за да има некакво соопштение“, наведуваат од ВМРО-ДПМНЕ, оценувајќи дека Македонија има потреба од силна и конзистентна опозиција, но дека, според нив, СДСМ не ја исполнува таа улога.
Полемиките околу Резолуцијата продолжуваат, а двете најголеми партии остануваат на дијаметрално спротивни позиции во однос на нејзината суштина и последици.
