„СДСМ секогаш е подготвен за избори – во септември го претставуваме Мастер планот за Македонија“, вели Филипче

СДСМ е подготвен за избори, но не сака да биде „алиби“ на власта за нивно распишување, порача лидерот на партијата Венко Филипче на денешната прес-конференција. Тој најави дека во септември партијата ќе го претстави „Мастер планот за Македонија“, преку кој граѓаните ќе ја видат нејзината политичка понуда.

Филипче, одговарајќи на новинарски прашања, рече дека СДСМ има подготвен тим, програма и конкретен план и дека партијата е подготвена за избори без оглед на тоа кога би се одржале.

— реклама —

„Го кажав тоа неколку пати до сега, секогаш сме подготвени. И со тим, и со добра програма, со еден план кој што ќе го презентираме, Мастер план за Македонија, ќе го презентираме во текот на септември, за да гласачите ја знаат нашата понуда, кога и да бидат изборите“, рече Филипче.

— реклама —

Сепак, лидерот на СДСМ вели дека неговата партија нема да му послужи на премиерот Христијан Мицкоски како оправдување за распишување предвремени избори.

„Алиби на Христијан Мицкоски за изборите нема да бидеме. Тој вика, доколку опозицијата бара избори, ние сме спремни веднаш да одиме. Се поставува прашањето, зошто не ја слуша опозицијата во други случаи?“, праша Филипче.

— реклама —

Тој го посочи и укинувањето на техничката влада, како и начинот на кој, според него, власта се обидува да го донесе Изборниот закон и покрај забелешките на опозицијата.

— реклама —

Филипче оцени дека Мицкоски сега се обидува од опозицијата да направи оправдување за евентуалното распишување предвремени избори.

„Ние апсолутно не сме алиби за предвремените избори. Предвремени избори ќе има, кога Христијан Мицкоски и неговата криминална група веќе нема да имаат пари“, порача претседателот на СДСМ.