СДСМ: Ширење паника или паника кај Мицкоски

СДСМ преку соопштение реагира на обвинувањата од премиерот Христијан Мицкоски дека опозицијата шири паника по случајот со „Алта банка“, прашувајќи дали предупредувањата за работењето на финансиската група во Европа, Црна Гора и Србија исто така претставуваат ширење паника. Од партијата велат дека уште пред една година алармирале за опасностите поврзани со влезот на банката во Македонија.

— реклама —

Во соопштението СДСМ објавува хронологија на настаните, почнувајќи од обидите на „Алта груп“ на Давор Мацура во 2023 и 2024 година да ја преземе „Адико банка“ во повеќе земји. Според партијата, во август 2024 година Европската централна банка привремено му го суспендирала правото на глас поради сомневања за тајно заедничко дејствување, а австрискиот регулатор во септември изрекол санкција. СДСМ се повикува и на пишувањата на „Фајненшл тајмс“ за проверки на потеклото на капиталот и контролите против перење пари.

Во октомври 2025 година Централната банка на Црна Гора го одбила преземањето на „Адико банка“, а гувернерката Ирена Радовиќ потврдила дека имало притисоци по донесувањето на одлуката. Истовремено, „Алта банка“ АД Белград ја презела Стопанска банка Битола, со одобрение од Народната банка на Македонија, стекнувајќи 95 отсто од акциите. Во 2026 година групацијата ја купила и осигурителната компанија ЗОИЛ Македонија, која подоцна го добила името „Алта осигурување“ АД Скопје.

— реклама —

СДСМ тврди дека Владата на Мицкоски испратила укажување до јавните претпријатија да одлучат за преземање акции од „Алта банка“, со што, според партијата, биле поддржани и банкарските и осигурителните активности на групацијата во Македонија.

— реклама —

Во октомври 2026 година, според соопштението, на Мацура му бил забранет влез во Црна Гора од причини на национална безбедност. На 30 и 31 октомври Народната банка на Србија ѝ ја одзела дозволата за работа на „Алта банка“ АД Белград и бил отворен стечај. Српското обвинителство започнало истрага, а на 2 ноември Мацура бил уапсен поради сомневања дека од трезорот изнел околу 380 милиони евра, дел физички, а дел преку фиктивно евидентирање. На 3 ноември судот формално отворил стечајна постапка.

Во Македонија, пак, на 1 ноември Народната банка вовела принудна управа во „Алта банка“ АД Битола и биле утврдени ограничувања за клиентите. СДСМ посочува дека граѓаните не можат слободно да располагаат со своите средства и потсетува на изјавата на гувернерот дека Мицкоски вршел притисок за издавањето на дозволата.

— реклама —

Од партијата бараат Обвинителството да реагира и да ги испита околностите околу влезот на „Алта груп“ во Македонија, како и наводните притисоци при издавањето на дозволата. СДСМ ги отфрла обвинувањата за ширење паника и оценува дека јавноста треба да добие одговори за одлуките што довеле до работењето на групацијата во земјава.