Членката на Извршниот одбор на СДСМ, Симона Цветаноски, ја обвини Владата дека потрошила 5,5 милиони евра за прославата и побара целосна транспарентност за начинот на кој биле доделени средствата.
„Бинго од 5,5 милиони евра за Мицкоски и неговата организирана криминална група со прославата, а за граѓаните празни џебови“, изјави Цветаноски.
Таа оцени дека станува збор за огромна сума пари и посочи дека граѓаните имаат право да знаат каде завршил секој денар.
„Парите се на граѓаните и граѓаните имаат право да ја знаат целата вистина. Да ги видат документите. Да знаат кој ги добил парите, за што се потрошени и каде завршил секој денар“, рече Цветаноски.
Од СДСМ поставија повеќе прашања до Владата, меѓу кои кои компании ги добиле средствата, како била избрана комисијата во Државна лотарија и кога бил договорен настапот на светскиот диџеј Дејвид Гета.
„Јавниот повик завршува на 8 мај, а само три дена подоцна, на 12 мај, власта веќе го најавува настапот на Дејвид Гета. За три дена го договоривте? Или со Гета сè било претходно договорено, уште пред да заврши јавниот повик?“, праша Цветаноски.
Таа побара одговор и за приходите од продадените билети, како и објавување на целокупната документација поврзана со организацијата на настанот.
„Велат не се пари на граѓаните? Па чиви се? Велат не се од буџетот туку од државни фирми. Не по шија, по врат. Парите се на граѓаните“, изјави Цветаноски.
Од СДСМ оценија дека станува збор за „огромна проневера на народни пари“ и порачаа дека власта ќе мора да даде одговори за сите сомнежи што ги отвора опозицијата.
