СДСМ обвини дека последните случаи на бактериолошки неисправна вода за пиење во Крушево, Гостивар, Валандово и болницата во Лешок се показател за, како што наведуваат, сериозен системски колапс во институциите задолжени за заштита на јавното здравје.
Од партијата посочуваат дека за само неколку дена се регистрирани четири случаи на загадена вода за пиење и прашуваат во колку други градови граѓаните користат неисправна вода без да бидат навремено информирани.
„Додека премиерот Христијан Мицкоски свечено отвора базен во Кавадарци, половина Македонија нема безбедна вода за пиење“, наведуваат од СДСМ, оценувајќи дека станува збор за последица на нестручност и лошо кадровско управување.
Во соопштението, СДСМ упатува критики и за кадровските решенија на Владата, тврдејќи дека тие придонеле за влошување на состојбата во повеќе институции. Партијата поставува и прашање дали ќе биде извршена контрола на квалитетот на водата во базенот што се отвора во Кавадарци.
Според СДСМ, случаите со неисправна вода не се изолирани инциденти, туку укажуваат на поширок проблем во функционирањето на системот.
