Еден човек загина, а две лица се водат како исчезнати откако туристички чамец со 19 патници се преврте во близина на островот Алкатраз во заливот на Сан Франциско.
Според американските власти, 13 патници безбедно стигнале до брегот, додека тројца биле пренесени во болница. Еден од повредените починал и покрај обидите за реанимација.
Во потрагата по исчезнатите учествуваат 11 пловила, како и Американската крајбрежна стража и други спасувачки служби.
Началникот на противпожарната служба во Сан Франциско, Дин Криспен, изјави дека причината за несреќата сè уште не е позната, додавајќи дека, спротивно на првичните информации, на чамецот немало пожар.
Иако времето било сончево и стабилно, источните морски струи создале силни бранови во заливот, што можеби придонело за несреќата.
Островот Алкатраз е една од најпознатите туристички атракции во САД. Некогашниот федерален затвор, кој функционирал од 1934 до 1963 година, денес е национално историско обележје што годишно го посетуваат илјадници туристи.
