„Македонијатурист“ започнува продажба на дел од својот недвижен имот во Скопје, откако Собранието на акционери на седницата одржана на 22 мај дало согласност за отуѓување на хотелите „Хотел Бристол“ и „Хотел Јадран“, познат како Арапска куќа.
Одлуката била објавена преку Македонска берза, а покрај хотелите ќе се продаваат и станови на улицата Максим Горки, како и деловниот простор „Пивница“.
Во соопштението се наведува дека претседателот на Управниот одбор е овластен да ги потпише купопродажните договори, а продажната цена ќе биде утврдена од овластен проценител.
Истовремено, акционерите одобриле и купување на парцела од 8.081 метар квадратен во населбата Реонски центар во Општина Аеродром, на улицата Г. Константиновиќ, за сума од 17,7 милиони евра.
Од компанијата информираат дека парцелата има градежна маркица за станбено-деловен објект, а идниот простор ќе биде наменет за продажба и издавање по изградбата.
Од Македонијатурист оценуваат дека инвестицијата ќе придонесе за дополнително зголемување на приходите во иднина.
Компанијата во своето портфолио ги има и „Хотел Белви“, „Бест Вестерн Хотел Турист“, „Хотел Карпош“ и „Холидеј ин“, кои продолжуваат со редовна работа.
