Сообраќајна несреќа во која тешко се повредила 28-годишна жена, а со телесни повреди се здобило и тригодишно дете, се случила вчера на патот меѓу селата Облешево и Кучичино.
Како што информира МВР, на 29 август во 09:55 часот во ОВР Кочани било пријавено дека А.Ј. (28) од село Тернци, Кочанско, управувајќи мопед, изгубила контрола над возилото и се превртела.
Во несреќата со тешки телесни повреди се здобила 28-годишната жена, додека тригодишното дете, кое било сопатник на мопедот, се здобило со телесни повреди.
Повредите биле констатирани во Клиничката болница во Штип.
Увид на местото на несреќата извршила увидна екипа од ОВР Кочани.
