Основниот суд во Куманово ја осуди Вангелица Илијевска на седум и пол години затвор откако таа ја призна вината за убиството на сопругот Јован и свекорот Стојан, извршено во јуни 2024 година.
Пресудата следуваше откако Основното јавно обвинителство изврши преквалификација на делото од „убиство“ во „убиство на миг“, врз основа на психијатриско вештачење кое утврдило дека обвинетата дејствувала во состојба на силна раздразливост и страв по претходен напад од нејзиниот сопруг.
Јавниот обвинител Газменд Мехмеди образложи дека вештачењето покажало оти Илијевска била доведена во состојба на силен афект и импулсивна реакција, без своја вина, поради закана по нејзината безбедност и физички интегритет.
Пред судот, Илијевска ја призна вината и изрази жалење за стореното, нагласувајќи дека дејствувала во афект.
Одбраната побара судот да ги земе предвид доказите дека обвинетата со години била жртва на семејно насилство, како и фактот дека е мајка на две малолетни деца и претходно не била осудувана.
Судскиот совет изрече казна од седум години и шест месеци затвор, во која ќе биде пресметано и времето поминато во куќен притвор. Судот одлучи мерката притвор да продолжи до правосилноста на пресудата.
Судијата Саша Ѓорѓевиќ истакна дека станува збор за сложен предмет кој барал детално разгледување на сите докази, додавајќи дека никој не може да биде целосно задоволен од ваква пресуда поради трагичните последици и загубата на два човечки животи.
Тој нагласи дека семејното насилство е сериозен општествен проблем и дека жртвите треба да добијат заштита од институциите, но истовремено посочи дека обвинетата имала можност да побара помош и да го напушти домот.
По изрекувањето на пресудата, незадоволство изразија членови на семејството на обвинетата, а Илијевска во судницата се расплака.
Нејзиниот адвокат Христијан Георгиевски изјави дека одбраната две години се обидувала да докаже дека првичното обвинение за убиство не одговара на фактичката состојба и дека преквалификацијата на делото ја потврдила нивната аргументација.
