Седум загинати по експлозиите кај Киев, Зеленски бара одговорност оти незаконски складирале оружје покрај станбени објекти, виновниците се идентификувани

Украинскиот претседател Володимир Зеленски соопшти дека се идентификувани одговорните лица за силните експлозии што го потресоа предградието Вишневе кај Киев, каде за време на неодамнешниот руски ракетен напад беше погодено складиште со муниција.

— реклама —

Според Зеленски, раководители на државниот одбранбен концерн „Укроборонпром“ го прекршиле законот дозволувајќи оружје и муниција да се складираат во близина на станбени објекти, наместо на локации предвидени за таа намена.

Во нападот, кој се случи ноќта меѓу недела и понеделник како дел од масовното руско бомбардирање на Киев, загинаа седум лица, а 29 беа повредени. Погоденото складиште предизвика серија секундарни експлозии што дополнително ја влошија катастрофата.

— реклама —

Зеленски изјави дека Службата за безбедност на Украина (СБУ) ги идентификувала главните одговорни лица, меѓу кои директори на две државни компании во состав на „Укроборонпром“, како и други функционери. Тој не ги откри нивните имиња, но порача дека сите ќе сносат одговорност.

— реклама —

„Во Украина постојат строго определени локации за складирање оружје и муниција, кои мора да бидат оддалечени од станбени згради. Познати се конкретните лица кои ги прекршиле овие правила и секој од нив мора да одговара“, изјави Зеленски.

Тој најави и поширока проверка на другите претпријатија од украинската одбранбена индустрија, со цел да се спречат слични трагедии во иднина.

— реклама —

Во меѓувреме, во Вишневе продолжува санацијата на последиците од нападот. Во акцијата се вклучени околу 300 припадници на службите за итни интервенции, кои работат на расчистување на теренот и обезбедување помош за погодените жители. Нападот врз Вишневе беше дел од поширокото руско бомбардирање на Киев, во кое вкупно загинаа 19 лица, а околу 90 беа повредени.