Сеф со злато, оружје, муниција и пари: четворица пријавени за 10 тешки кражби

Серија од десет тешки кражби и обиди за тешка кражба во повеќе населени места во Тетовско е расчистена, откако СВР Тетово поднесе кривични пријави против четири лица.

— реклама —

Пријавени се Е.В. (43) од село Никуштак, Х.А. (53) од Косово, А.А. (34) од село Отља и Е.А. (34) од село Никуштак, кои се сомничат за четири кривични дела „тешка кражба“ и шест „тешка кражба во обид“.

Според МВР, на 19 септември 2026 година во село Долно Палчиште, од куќа на А.А. бил одземен сеф со златен накит, оружје и муниција, чија вредност била проценета на околу 160.000 евра.

— реклама —

Во истиот реон, во периодот од 24 до 28 ноември 2025 година, од куќата на Б.И. биле одземени златен накит и пари во вредност од околу 70.000 евра.

— реклама —

Пријавените се сомничат и дека на 10 мај 2026 година, во спортска обложувалница во село Теарце, со употреба на сила отвориле сеф и одзеле пари. Во периодот од 23 до 26 мај, пак, од магацински простор на бензинска станица во село Пирок биле одземени повеќе пакувања цигари.

Покрај реализираните кражби, од април до септември годинава, пријавените во шест наврати влегувале во куќи и други објекти во Камењане, Долно Палчиште, Нераште, Теарце и Радиовце. Таму извршувале пребарување, но не одзеле предмети.

— реклама —

За случајот е поднесена кривична пријава поради постоење основи на сомнение за сторените кривични дела.