„Сега се живее многу полошо отколку пред две-три години“ – Филипче со критики до Владата

„Ќе ја вратиме власта во рацете на граѓаните, ќе влеземе во Европа и младите ќе ја гледаат иднината тука“, порача претседателот на СДСМ, Венко Филипче, обвинувајќи ја актуелната власт дека не исполнила ниту едно од клучните ветувања со кои дошла на власт.

Одговарајќи на новинарско прашање, Филипче оцени дека Македонија не напредува на европскиот пат, дека животниот стандард е влошен, а како најголем проблем го посочи губењето на надежта кај граѓаните, особено кај младите.

— реклама —

„Што се случи со европскиот пат, кога регионот оди напред? Ништо. Рекоа дека ќе ги подобрат условите. Ќе го поништуваа Преспанскиот договор. Не знам што сè друго ветуваа. Ништо од тоа нема. Ништо, буквално“, рече Филипче.

Тој ја обвини Владата дека не презела мерки со кои, според него, реално би го подобрила животот на граѓаните.

— реклама —

„Ќе се грижеа за граѓаните. Кажете една мерка со која се грижат за граѓаните, една работа. Сега се живее многу полошо отколку пред две-три години“, рече лидерот на СДСМ.

Според Филипче, уште посериозна последица е чувството дека состојбите во земјата не можат да се подобрат.

— реклама —

„Не само што се живее полошо, најстрашното од сè е што на луѓето им е убиена надежта дека тука може да биде подобро место за живеење со оваа криминална група, затоа што им даваат лош пример на младите и за тоа како се владее и како се менаџира со државата“, изјави Филипче.

Тврдењето за „криминална група“ е политичка квалификација на претседателот на СДСМ за актуелната власт.

Филипче најави дека СДСМ ќе се обиде да ја врати земјата на европскиот пат и порача дека промената треба да значи и враќање на довербата на младите дека својата иднина можат да ја градат во Македонија.

„Ќе ја вратиме власта во рацете на граѓаните и оваа работа ќе се смени. И ќе влеземе во Европа, и младите ќе ја гледаат иднината тука“, рече Филипче.