Британскиот енергетски гигант „Шел“ (Shell) во вториот квартал од годинава оствари нето добивка од 9,84 милијарди долари, што е повеќе од двојно зголемување во споредба со истиот период лани и значително над очекувањата на аналитичарите.
Компанијата соопшти дека растот на добивката главно се должи на повисоките цени на нафтата и природниот гас, силните резултати од трговијата со енергенси и подобрените маржи во секторот за преработка.
Во истиот квартал минатата година „Шел“ оствари добивка од 4,26 милијарди долари, додека аналитичарите очекуваа овогодишниот резултат да достигне околу 8,92 милијарди долари.
Позитивните финансиски резултати беа поттикнати и од зголемената нестабилност на енергетските пазари поради конфликтите на Блискиот Исток, што овозможи повисоки приходи од трговијата со течен природен гас и сурова нафта.
Иако производството на природен гас се намалило за 31 процент поради прекин во работата на постројката Pearl GTL во Катар, оштетена во напад во март, секторот за интегриран гас сепак остварил добивка од 2,7 милијарди долари.
Во меѓувреме, секторот за хемикалии и нафтени деривати го забележал најдобриот резултат од 2021 година наваму, со добивка од 2,3 милијарди долари.
Главниот извршен директор Ваел Саван оцени дека зголемената нестабилност на енергетските пазари ќе продолжи и во наредниот период, додавајќи дека таквите услови се поволни за глобалното трговско работење на компанијата.
„Шел“ истовремено соопшти дека нето-долгот е намален на 41,8 милијарди долари, а програмата за откуп на сопствени акции ќе остане на ниво од три милијарди долари по квартал.
