Селекторот на Шпанија, Луис де ла Фуенте, потврди дека Ламин Јамал е подготвен да настапи на премиерниот натпревар на „Фуријата“ на Светското првенство 2026, но нема да биде дел од почетниот состав против Зеленортските Острови.
На прес-конференцијата во пресрет на првиот меч на актуелниот европски шампион, Де ла Фуенте изјави дека младиот фудбалер на Барселона успешно ги надминал проблемите кои претходно го доведоа во прашање неговиот настап.
„Јамал? Тој е во добра форма и пристигна токму кога посакувавме. Се чувствува многу добро, како и останатите кои имаа одредени проблеми. Сите се на располагање, но тројца нема да бидат стартери. Ќе видиме како ќе се развива натпреварот“, изјави шпанскиот селектор.
Тој додаде дека лекарските тимови на Барселона и шпанската репрезентација се согласиле дека Јамал е подготвен за настап.
„Не е подготвен за 90 минути, но е подготвен за едно полувреме. Не знам колку точно ќе игра, но е во одлична состојба да добие одредена минутажа и лекарите се согласуваат со тоа“, рече Де ла Фуенте.
На прес-конференцијата тој се осврна и на можниот трансфер на Марк Кукуреља во Реал Мадрид, нагласувајќи дека таквите случувања нема да влијаат врз атмосферата во националниот тим.
„Тоа воопшто нема да влијае на него. Се радуваме на ситуациите што ги прават играчите среќни. Никој нема да направи нешто што би ѝ наштетило на групата. Среќен сум колку и тие“, истакна шпанскиот стратег.
Шпанија денеска од 18 часот ќе го започне походот кон светската титула со дуелот против дебитантот на мундијалите, селекцијата на Зеленортските Острови, а останува да се види колкава улога ќе има Ламин Јамал на стартот од турнирот.
