Семејството Јовкови со емотивна јавна реакција ја објави својата огорченост откако Апелациониот суд Скопје ја намали затворската казна за Гоце Димков, осуден за сообраќајната несреќа во која животот го загуби нивната 27-годишна ќерка Таце Јовкова.
„Ја родив за друг да ми ја убие... Болката ја имаме, а правдата ја убивте“, напиша семејството во објавата.
Според нив, Основниот суд во Неготино првично му изрекол затворска казна од четири години, но Апелациониот суд Скопје ја намалил на две години и шест месеци.
Семејството наведува дека Таце загинала откако товарно возило, управувано од Гоце Димков од село Возарци, со брзина од 69,7 километри на час на место каде што ограничувањето било 50 километри на час, навлегло во спротивната сообраќајна лента. Во објавата се тврди и дека возилото било технички неисправно, иако, според нив, еден месец претходно поминало технички преглед.
Во реакцијата се наведува дека второстепената пресуда ја донел судски совет во состав: Александра Ристеска, како претседател на советот, м-р Лирие Елези Ајрулау и д-р Габриела Гајдова. Семејството посочува и дека во постапката било доставено писмено мислење од Вишото јавно обвинителство Скопје.
„Ви благодариме што покажавте колку вреди еден млад човечки живот во оваа држава. Нашата болка останува засекогаш, а вие со вашата одлука ја убивте и последната надеж за правда. Ова ли е правната држава Македонија?“, наведува семејството во објавата, изнесувајќи и обвинувања за „корупција и мито“.
Претходно, семејството во друга јавна реакција ја спореди оваа пресуда со случај во кој, како што тврдат, била изречена тригодишна затворска казна за кражба на 150 ќебапи.
„Каква правда има во нашата Македонија? Дали вредноста на животот на моето девојче Таце стана помала од неколку парчиња месо, па виновникот за нејзината смрт да добие помала казна од некој што украл храна?“, прашуваат родителите.
Во истата објава тие потсетуваат дека, и покрај трагедијата, донеле одлука да ги донираат органите на нивната ќерка.
„Иако нашето срце е засекогаш скршено, во најтешкиот миг од животот донесовме благородна одлука – ги дониравме органите на нашето чедо. Благодарение на оваа постапка спасени се два човечки животи. Нашето девојче Таце замина во вечноста како ангел, но остави живот зад себе“, наведува семејството Јовкови.
