Тетовската полиција во текот на 23 септември постапувала по три одделни пријави за физички напади во Тетовско, при што во два случаи биле приведени лица.
Во 15:25 часот во селото Радиовце, Општина Брвеница, полициски службеници од Полициското одделение Жеровјане ги лишиле од слобода Е.Н. (25) и Н.Н. (28), двајцата од Теново. Приведувањето уследило по пријава од Б.Ш. од истото село, кој пријавил дека бил физички нападнат од нив, при што биле употребени и метални предмети. Двајцата се задржани во полициска станица, а по целосното документирање на случајот ќе следува соодветен поднесок.
Истиот ден во 17:05 часот, полициски службеници од СВР Тетово го привеле Ф.С. (37) од Џепчиште. Претходно било пријавено дека на 22 септември околу 22 часот во селото, тој физички го нападнал А.А. (44), исто така од Џепчиште. По расчистувањето и документирањето на случајот, против Ф.С. ќе биде поднесен соодветен поднесок.
Во Клиничката болница Тетово, пак, 28-годишниот И.Ш. од Голема Речица пријавил дека на 23 септември околу 11 часот бил физички нападнат во перална во селото, по кратка расправија со Н.С. од истото место.
Од полицијата информираат дека во овој случај се преземаат мерки за расчистување на настанот.
