Шест лица, меѓу кои и тројца малолетници, уапсени поради возење без дозвола

Во засилени сообраќајни контроли спроведени во текот на вчерашниот ден, полициските службеници од СВР Тетово лишиле од слобода шест лица, меѓу кои и тројца малолетници, поради управување моторни возила без возачка дозвола.

— реклама —

На улицата „Маршал Тито“ во Тетово, во 10:05 часот, полициски службеници од Полициската станица за безбедност на патниот сообраќај Тетово го лишиле од слобода М.М. (18) од Тетово, кој управувал патничко возило „Фолксваген голф“ без да се стекне со право на управување моторно возило. Возилото било одземено, а против него ќе биде поднесена соодветна пријава согласно член 297-а од Кривичниот законик.

Подоцна, во 14:20 часот на улицата „Киро Ристоски Дрнц“ во Тетово, полициски службеници привеле 16-годишен малолетник од Тетово, кој управувал мотоцикл без регистарски таблички и без возачка дозвола. И овој мотоцикл е одземен, а по целосно документирање на случајот ќе следува соодветна пријава.

— реклама —

Во Гостивар, на улицата „Беличица“, околу 17:00 часот, полициски службеници запреле мопед управуван од 15-годишен малолетник од селото Долна Ѓоновица. При контролата било утврдено дека малолетникот не поседува возачка дозвола, по што бил лишен од слобода во присуство на родител и инспектор за малолетници. Мопедот е задржан, а против него ќе следува соодветна пријава.

— реклама —

Во 18:30 часот, во гостиварското село Долна Бањица, полицијата привела уште три лица поради управување возила без возачка дозвола. Станува збор за Е.И. (26) од Гостивар, кој управувал мопед со скопски регистарски таблички, како и Р.С. (25) од Тетово и Џ.У. (25) од Гостивар, кои управувале мотоцикли без регистарски ознаки. Возилата им биле одземени, а против нив ќе бидат поднесени соодветни пријави.

Исто така, во 22:40 часот, во близина на клучката Групчин, полициски службеници го лишиле од слобода С.С. (38) од селото Буковиќ, кој бил затекнат како управува товарно моторно возило со скопски регистарски ознаки без возачка дозвола.

— реклама —

По целосното документирање на сите случаи, против приведените ќе следуваат соодветни поднесоци согласно Кривичниот законик.