Шест лица загинаа во масовно пукање што се случило на повеќе локации во градот Маскатин, во американската сојузна држава Ајова, а првичните информации на полицијата укажуваат дека станува збор за семеен конфликт.
Шефот на полицијата во Маскатин, Ентони Кис, на прес-конференција изјави дека заедницата е потресена од трагедијата.
„Денес едноставно немам зборови за овој чин на зло и за тоа што ѝ го направи на нашата заедница“, изјави Кис.
Според истрагата, жртвите биле пронајдени на три различни локации – во две семејни куќи и во еден деловен објект. Полицијата првата пријава за пукањето ја добила околу 12:12 часот по локално време.
Кога пристигнале на местото на настанот, полициските службеници пронашле четири лица убиени во една куќа. Осомничениот, идентификуван како 52-годишниот Рајан Вилис Мекфарланд, веќе го напуштил местото пред пристигнувањето на полицијата.
Набргу потоа, полицијата го лоцирала покрај реката Мисисипи. Додека разговарале со него, осомничениот си го одзел животот.
„Полицијата и медицинскиот персонал веднаш укажаа помош, но можеше само да биде констатирана смртта“, изјави шефот на полицијата.
Во текот на понатамошната истрага, детективите откриле уште две жртви. Еден маж бил пронајден во куќа, а друг во блискиот деловен објект.
Од Полициската управа соопштија дека првичните сознанија укажуваат оти пукањето било последица на семеен конфликт и дека сите жртви најверојатно биле членови на семејството на починатиот осомничен.
Полицијата потврди дека осомничениот имал криминално досие, но засега не соопштува дополнителни детали за неговото минато, ниту пак ги открива идентитетите на жртвите.
Истрагата за случајот продолжува.
