Шасивари: Довербата во правдата се заслужува со дела, а не со ветувања

По повод 25 Октомври – Европскиот ден на правдата, министерот за правда д-р Јетон Шасивари порача дека независното судство, професионалното обвинителство и одговорните институции се основа за правна држава и доверба кај граѓаните.

Во својата порака, Шасивари истакна дека правдата е темел на правната држава, чувар на слободата и достоинството на секој човек, како и показател за зрелоста на институциите.

— реклама —

„Без независно судство, професионално обвинителство и одговорни институции, нема правна сигурност, нема еднаквост и нема вистинска доверба“, порача министерот.

Тој нагласи дека неговата определба како министер за правда е да се изгради правосуден систем во кој законот ќе биде над секој интерес, правдата нема да зависи од ничија моќ, а секој граѓанин ќе има еднакво право на заштита и правично постапување.

— реклама —

Според Шасивари, на државата ѝ е потребно судство кое одлучува независно, непристрасно и во разумен рок, обвинителство кое постапува професионално и неселективно, како и институции што ќе ја оправдаат довербата преку конкретни резултати, интегритет и одговорност.

— реклама —

Министерот посочи дека реформите во правосудството не треба да се оценуваат само според бројот на донесени закони, туку пред сè според промените што граѓаните реално ќе ги почувствуваат, меѓу кои поефикасни постапки, поквалитетни одлуки, поголема правна сигурност и еднаква примена на законот за сите.

Осврнувајќи се на европската иднина на земјата, Шасивари истакна дека таа подразбира примена на европските стандарди во сите институции, доследно спроведување на реформите и одговорност без исклучоци.

„Довербата во правдата не се бара – таа се заслужува. Не со декларации, туку со дела. Не со ветувања, туку со резултати“, нагласи Шасивари.

Тој заклучи дека правдата е обврска, одговорноста е должност, а довербата се заслужува, упатувајќи честитка по повод Европскиот ден на правдата, 25 Октомври.