Во текот на изминатата вечер и ноќ, од 21 кон 22 август, полицијата во Скопје санкционирала 262 возачи во рамки на засилена сообраќајна контрола, со посебен акцент на мотоцикли, мопеди, трицикли и четирицикли.
Акцијата била спроведена од 18 часот до 1 часот по полноќ од Одделението за безбедност на патниот сообраќај и полициските станици од општа надлежност при СВР Скопје.
Од вкупниот број санкции, 102 биле изречени за возачи на мопеди и мотоцикли.
Најголем дел, односно 93 мерки, биле за управување мотоцикл без заштитна кацига. Четворица возачи биле санкционирани поради несоодветна категорија, а петмина затоа што управувале без положен возачки испит.
Дополнително биле изречени уште 160 мерки за други прекршоци, меѓу кои неносење возачка дозвола, неносење сообраќајна дозвола, неистакнати регистарски таблички и поминување на црвено светло.
Полицијата привремено одзела и еден мотоцикл затоа што регистрацијата му била истечена повеќе од шест месеци.
Шест лица биле лишени од слобода по член 297-а од Кривичниот законик.
Од МВР најавуваат дека сообраќајните контроли ќе продолжат и во наредните денови и апелираат до сите учесници во сообраќајот да ги почитуваат правилата и прописите.
