Шест жртви во поплавите во Турција, продолжува потрагата по исчезнатите

Бројот на жртви во поплавите што ги погодија Истанбул и Коџаели во Турција се искачи на шест, откако спасувачките екипи пронајдоа тела на уште две исчезнати лица. Потрагата по исчезнатите продолжува по поплавите што го зафатија Истанбул на 14 октомври.

— реклама —

Според информациите на „ТРТ Хабер“, поморската полиција во заливот Златен Рог во Истанбул го пронашла телото на 30-годишниот Мурат Бабаџанов, државјанин на Туркменистан. Со тоа, бројот на загинати во Истанбул се искачи на пет, а се трага по уште две исчезнати лица.

— реклама —

Во областа Гебзе, во провинцијата Коџаели, било пронајдено и телото на едно од двете лица што исчезнале откако надојдената вода го однела нивниот џип. Идентитетот на загинатиот сè уште не е утврден, а потрагата по другото лице продолжува. Пронаоѓањето на телото траело околу 13 часа.

— реклама —

Обилните врнежи во средата предизвикале излевање на поток во населбата Ајазага во Истанбул, при што биле оштетени бројни куќи, деловни објекти и возила.

Во погоденото подрачје продолжуваат и активностите за уривање на објектите што се сметаат за ризични и се наоѓаат покрај коритото на потокот.