Шестгодишно момче пронајдено со убодни рани во стан во Софија, таткото скокнал од петти кат од зградата во која живееле

Трагичен настан ја потресе Софија, каде денеска животот го загубија шестгодишно момче и неговиот 40-годишен татко.

Според информациите објавени во бугарските медиуми, околу 11 часот мажот скокнал од петтиот кат на станбената зграда во која живеел. Кратко потоа, во станот било пронајдено неговото шестгодишно дете со повеќе убодни рани. Екипите на Итната медицинска помош можеле само да ја констатираат смртта на двајцата.

— реклама —

Првата пријава до службите била примена околу 11:20 часот. Директорот на софиската полиција, Николај Пелтеков, изјавил дека во врска со случајот биле примени вкупно четири пријави.

Според првичните информации, бабата на детето излегла да купи намирници, а по враќањето го пронашла својот внук со убодни рани и веднаш повикала помош. Во станот живееле детето, неговиот татко и родителите на таткото.

— реклама —

Од полицијата соопштиле дека за 40-годишниот маж постоеле податоци дека претходно бил приведуван поради агресивно однесување и дека бил сместуван во установа за психијатриска грижа.

— реклама —

По полицискиот брифинг биле објавени информации дека тој имал психички проблеми поврзани со употреба на медикаменти и алкохол и дека му била препишана терапија. Сега се проверува дали редовно ја земал препишаната терапија.

Мајката на детето, според досегашните информации, го напуштила семејството пред околу три години.

Полицијата наведува дека претходно немало пријави за семејно насилство или конфликти со соседите што би укажале дека постои опасност од ваков трагичен настан. И соседите го опишале семејството како непроблематично.

Истрагата треба да ги утврди сите околности и точниот тек на трагичниот настан.