Продлабочување на соработката со Шпанија во областа на правосудството и поддршка за реформите беа во фокусот на денешната средба меѓу министерот за правда, Јетон Шасивари, и амбасадорот на Кралството Шпанија, Рафаел Соријано Ортиз.
Шасивари го информирал шпанскиот амбасадор за приоритетите на Министерството за правда и активностите што се спроведуваат во рамки на реформската агенда. Во наредниот период се очекуваат конкретни законски и институционални чекори, насочени кон подобрување на ефикасноста и квалитетот на правосудниот систем.
На средбата посебно се разговарало за можностите за продлабочување на соработката со Шпанија и искористување на нејзиното искуство во функционирањето на правосудните институции и во областа на владеењето на правото.
Амбасадорот Соријано Ортиз ја потврдил подготвеноста на Шпанија да продолжи да ги поддржува реформските процеси во Македонија.
Од Министерството за правда посочуваат дека соработката со европските партнери е важен дел од реформскиот процес, но оти успехот ќе се мери преку конкретни промени и подобро функционирање на институциите.
