Штит, шлем, меч и златни прилози пронајдени во гроб од VI век кај Корошишта

Богато војничко погребување од VI век пред новата ера е откриено на археолошкиот локалитет Расница кај струшкото село Корошишта.

Во гробот се пронајдени штит, шлем, копја и меч, како и богати прилози изработени од злато, бронза и килибар.

— реклама —

Најновото откритие е продолжение на значајните археолошки наоди од 2024 година, кога истражувањата на локалитетот резултираа со откривање богата гробна целина.

Тогаш биле пронајдени бронзен шлем со златни апликации, бронзен штит, златни предмети, килибарни и стаклени мониста, сребрени игли и повеќе бронзени садови.

— реклама —

Најновите наоди дополнително го потврдуваат карактерот на Расница како архајска некропола и отвораат можности за подетално проучување на погребните обичаи, воената и општествената структура, како и елитите што живееле во Охридско-струшкиот регион во VI век пред новата ера.

— реклама —

Истражувањата ги спроведува Националниот археолошки музеј од Скопје, во соработка со Заводот за заштита на спомениците на културата и музеј – Охрид и Управата за заштита на културното наследство.

— реклама —

На денешната прес-конференција за значењето на новите откритија говореа кустосот советник во Националниот археолошки музеј, д-р Перо Арџанлиев, директорката на Националниот археолошки музеј, Магдалена Манаскова, директорката на Управата за заштита на културното наследство, Весела Честоева, како и директорите на НУ Завод и музеј – Охрид, Горан Патчев, и на НУ Музеј „Д-р Никола Незлобински“ – Струга, Цветлана Василевска.

Според надлежните, новите наоди се значаен придонес кон проучувањето на архајскиот период во Македонија. Со континуираните истражувања, Расница сè повеќе се издвојува како еден од значајните археолошки комплекси од овој период во земјава.