Со свечена церемонија и највисоки државни и воени почести, претседателката Гордана Сиљановска-Давкова денеска ја пречека претседателката на Република Индија, Друпади Мурму, која престојува во прва официјална посета на Македонија.
По тет-а-тет средбата на двете претседателки се одржа и пленарен состанок на македонската и индиската делегација, на кој се разговараше за унапредување на билатералните односи и за можностите за соработка во повеќе области.
Во фокусот на разговорите беа економијата, образованието, науката, културата, туризмот, здравството и дигиталната трансформација, а беше разменето мислење и за актуелните глобални предизвици, при што беше истакната важноста од почитување на меѓународното право и мирното решавање на споровите.
Сиљановска-Давкова оцени дека посетата претставува значаен чекор во продлабочувањето на македонско-индиските односи, посочувајќи дека заедничкото хумано наследство на Света Мајка Тереза и искуството од Движењето на неврзаните се добра основа за натамошно развивање на партнерството.
Таа нагласи дека геостратешката положба на Македонија, инфраструктурните коридори и пристапот до европскиот пазар претставуваат можност што може да биде особено привлечна за индиските инвеститори.
Претседателката на Индија, Друпади Мурму, ја оцени својата прва официјална посета на Македонија како историски момент и изрази подготвеност за нова динамика во развојот на сеопфатното партнерство меѓу двете земји.
Двете претседателки се согласија дека политичкиот дијалог и меѓуинституционалната соработка се клучни за натамошното продлабочување на билатералните односи.
