Силна експлозија во магацин за оружје во Бугарија, огнот го осветли ноќното небо

Силна експлозија предизвика пожар во магацин за оружје во централниот дел на Бугарија во текот на ноќта, а огнот бил толку силен што го осветлил ноќното небо. Засега нема информации за повредени.

Пожарот избувнал во близина на селото Царева Ливада, а снимките објавени од локалните медиуми покажуваат голем пламен над објектот.

— реклама —

„Во овој момент пожарот го зафати магацинскиот дел од фабриката и се шири од магацин до магацин“, изјави регионалната гувернерка на Габрово, Кристина Сидорова.

Според бугарските медиуми, кои се повикуваат на извор од компанијата „ЕМКО“, пожарот избувнал во објект со кој управува компанијата. Станува збор за втор инцидент во нејзините постројки во период од само неколку недели – минатиот месец експлозија се случила и во друг објект.

— реклама —

„ЕМКО“ ја предводи бугарскиот трговец со оружје Емилијан Гебрев, а компанијата и нејзините магацини и претходно беа во фокусот на истраги за серија експлозии.

— реклама —

Бугарските обвинители во минатото тврдеа дека објекти на компанијата биле цел на руски оперативци. Во 2024 година Бугарија издаде налози за апсење на шест руски државјани обвинети за вмешаност во уништување магацини на „ЕМКО“ во периодот од 2011 до 2020 година. Во дел од нив се чувала муниција наменета за извоз во Украина и Грузија.

Обвинителите тогаш изнесоа сомневање дека експлозиите во Бугарија, обидот за труење на Гебрев во 2015 година и експлозиите во магацини за муниција во Чешка во 2014 година би можеле да бидат поврзани.

— реклама —

Москва ги отфрли ваквите обвинувања.

Причината за најновата експлозија и пожарот засега не е утврдена, па нема официјална потврда дека актуелниот инцидент е поврзан со претходните случаи.