Силниот ветер го наруши авиосообраќајот во Амстердам, проблеми и во железничкиот сообраќај

На аеродромот „Схипхол“ во Амстердам денеска се откажани десетици летови поради силниот ветер предизвикан од бурата „Боело“, додека во одредени делови на Холандија сè уште е на сила жолто предупредување.

Откажани се бројни летови на авиокомпаниите КЛМ, Луфтханза и Изиџет, бидејќи силниот ветер оневозможува користење на одредени аеродромски писти, пренесува „NL Times“.

— реклама —

„Авиокомпаниите ги приспособуваат своите редови на летање. Патниците треба да сметаат на откажувања и доцнења“, изјави портпаролот на аеродромот „Схипхол“.

Од аеродромот наведуваат дека патниците ќе добијат информации за своите летови директно од авиокомпаниите.

— реклама —

Компанијата КЛМ уште во петокот и саботата откажала десетици летови поради силниот ветер.

Силниот ветер во текот на ноќта меѓу саботата и неделата предизвикал и материјална штета.

— реклама —

Во делот Амстердам-Норд, дрво паднало врз автомобил што бил во движење.

Во близина на местото Лохем, во покраината Гелдерланд, дрво паднало врз железничката пруга, поради што утрово возовите не сообраќале.

Во покраината Фрисланд, надлежните служби за безбедност ги повикале граѓаните да не се јавуваат на бројот 112 за случаи на паднати дрвја или гранки, освен ако не се работи за непосредна опасност.

„На тој начин телефонската линија 112 ќе остане слободна за пријави за ситуации во кои луѓето или животните се во непосредна опасност“, се наведува во апелот.